Azərbaycan Milli Elmlər Akademiyasının prezidenti, akademik Ramiz Mehdiyevin tapşırığına əsasən Mərkəzi Nəbatat Bağında aparılan  quruculuq və təmir-bərpa işləri uğurla davam edir.

Qeyd edək ki, Bağın ekskursiyaya açıq sahələrinə müasir işıqlandırma sisteminin quraşdırılması istiqamətində işlər uğurla davam etdirilir. Layihə işıqlandırılması olmayan və yeni salınan ekskursiya sahələrini əhatə etməsi ilə yanaşı vahid idarəetmə sistemi ilə quraşdırılan bu sistemlər bir sıra xüsusiyyətlərinə görə üstündür. İlkin mərhələdə, mövcud olan elektrik naqilləri yenilənib xüsusi qəliblərdə hazırlanıb işıq dirəklərinin quraşdırılması üçün hazır vəziyyətə gətirilib. Yekun mərhələdə eskursiyaya sahələrinin işıqlandırılması üçün müasir işıqlandırma sistemləri quraşdırılacaq. Müasir işıqlandırma sistemləri quraşdırılmasının əsas məqsədi Bağı ziyarət edən vətəndaşların hərəkətini asanlaşdırmaq və Bağın estetik görünüşünü daha da gözəlləşdirməkdir.

Yaşıllaşdırma işləri çərçivəsində Bağda dekorativ və meyvə ağaclarının əkini müntəzəm olaraq davam edir. Əkin zamanı bitkilərin inkişafı üçün vacib olan aqrotexniki qaydalar gözlənilir. Belə ki, bitkiləri əkini üçün torpağın əkinə hazırlanması vacib məsələlərdən biri olmaqla yanaşı, torpağın münbitliyindən, iqlim şəraitindən, becəriləcək bitkinin bioloji xüsusiyyətindən çox asılıdır. Torpağın əkinə hazırlanması onun şumlanmasından və yumşaldılmasından ibarətdir. Bitkilərin normal böyüyüb inkişaf etməsi onların düzgün əkilməsindən çox asılıdır.  Bitkiləri sahədə yerləşdirərkən səhvə yol verməmək üçün onların yerini layihə və plan - eskizə əsasən qabaqcadan müəyyən etmək məsləhətdir.

Həmçinin, ekskursiyaya açıq sahələrin yolboyu hissələrinin abadlaşdırılması məqsədilə keyfiyyətli beton döşəmə piltələrin salınması prosesi artıq yekunlaşdırılıb. Yol boyu olan köhnə daş bardyurların yeniləri ilə əvəzlənməsi prosesi isə davam edir. 

Həyata keçirilən işlər şübhəsiz ki, gələcəyə hesablanmış strategiyanın reallaşmasını şərtləndirən əsas amillərdəndir. İnkişaf konsepsiyası Bağın baş direktoru Natiq Allahverdiyevin nəzarəti ilə həyata keçirilir.